नागपुरात स्पाच्या नावाखाली सुरू असलेल्या देहव्यापाराचा पर्दाफाश; दोन महिलांना अटक

Image Source:(Internet) 

गुन्हे शाखेच्या सामाजिक सुरक्षा विभागाने “ऑपरेशन शक्ती” अंतर्गत अजनी परिसरात धडक कारवाई करून स्पा सेंटरमध्ये सुरू असलेला देहव्यापाराचा (Prostitution) प्रकार उघडकीस आणला. पोलिसांनी दोन महिलांना ताब्यात घेतले असून एका तरुणीची मुक्तता करण्यात आली आहे.

 

मिळालेल्या माहितीनुसार, ही कारवाई अजनी रोडवरील मेडिकल कॉलेजसमोरील क्लासिक अंबर अपार्टमेंट येथील “एक्सोटिक स्पा अँड सॅलून” मध्ये करण्यात आली. येथे अनैतिक कामकाज सुरू असल्याची गुप्त माहिती पोलिसांना मिळाल्यानंतर पथकाने साक्षेपी कारवाईचे नियोजन केले. एका खोट्या ग्राहकाला स्पामध्ये पाठवून परिस्थितीची खात्री करण्यात आली.

 

ग्राहकाशी व्यवहार ठरल्यानंतर महिला खोलीत आल्याबरोबर पोलिसांनी अचानक प्रवेश करून तिला तसेच दोन महिलांना अटक केली. पकडलेल्या महिलांची नावे प्रतिमा मंगेश बडगे आणि किरण दयालू उके अशी आहेत.

 

तपासात असे समोर आले की, प्रतिमा स्पा चालवत होती, तर किरण उके रिसेप्शनवर ग्राहकांशी संवाद आणि पैशांचे व्यवहार सांभाळत होती. विशेष म्हणजे, प्रतिमा यापूर्वीही अशाच प्रकरणात पीडिता म्हणून सापडली होती. त्यानंतर ती रायपूरला गेली आणि तेथे पुन्हा या धंद्यात सक्रिय झाली. तिथेच तिची ओळख झालेल्या तरुणीला जास्त कमाईचे आमिष दाखवून तिने नागपूरात आणले होते.

 

छाप्यामध्ये दोन मोबाईल फोन, सीसीटीव्ही डीव्हीआर, पेन ड्राईव्ह आणि रोख रक्कम मिळून अंदाजे 27 हजार रुपयांचा मुद्देमाल पोलिसांनी जप्त केला आहे. हा स्पा केंद्र मागील पाच महिन्यांपासून कार्यरत असल्याचे तपासातून स्पष्ट झाले.

 

दोन्ही आरोपी महिलांविरुद्ध अनैतिक व्यापार प्रतिबंधक कायद्यानुसार गुन्हा नोंदवून अजनी पोलीस पुढील चौकशी करत आहेत.