महायुती सरकार मतचोरी करून सत्तेत आली; विजय वडेट्टीवारांचा आरोप
Total Views |
Image Source:(Internet)
नागपूर :
मुंबईत मतदार याद्यांतील गोंधळाच्या विरोधात आज महाविकास आघाडीचा भव्य मोर्चा निघाला आहे. या मोर्चात सहभागी होण्यासाठी काँग्रेसचे नेते विजय वडेट्टीवार (Vijay Wadettiwar) नागपूरहून मुंबईकडे रवाना झाले. रवाना होण्यापूर्वी पत्रकारांशी बोलताना त्यांनी सरकार आणि निवडणूक आयोगावर तीव्र टीका केली.
वडेट्टीवार म्हणाले, “मुंबईत होणाऱ्या सत्य मार्चमध्ये भलेही काँग्रेसचे झेंडे किंवा बॅनर नसतील, तरी आम्ही या मोर्चात सहभागी होत आहोत. आमचे वरिष्ठ नेते यात हजर राहतील. प्रत्येक नेत्याची उपस्थिती आवश्यक नाही, पण या लढ्यात आम्ही ठाम आहोत.”
ते पुढे म्हणाले, “आता हे सिद्ध झाले आहे की महायुती सरकार मतचोरी करून सत्तेत आली आहे. राज ठाकरेसह अनेक नेते आता राहुल गांधींच्या विचारांशी सहमत होत आहेत. सत्ताधारी लोक मत मिळवण्यासाठी जनतेला खोटे आश्वासन देत आहेत, फसवणूक करत आहेत.”
वडेट्टीवारांनी आरोप केला की, “मतदार याद्यांमध्ये प्रचंड गैरव्यवहार झाला आहे. एका घरात ४००-४०० मतदार दाखवले गेले आहेत. हे कोणाच्याही आदेशाशिवाय शक्य नाही. निवडणूक आयोगाकडे आम्ही वारंवार या गोंधळाबद्दल विचारणा केली, मात्र त्यांनी एकही समाधानकारक उत्तर दिले नाही. त्यांचा वर्तनप्रकार पाहता असं वाटतं की ते सरकारचेच सहकारी आहेत.”
ते म्हणाले, “लोक आता सगळा हिशेब चुकता करतील. ज्यांच्या मतांच्या बहुमतात जनतेचा सहभाग नव्हता, त्यांनी बेईमानीने सत्ता मिळवली आहे. मतदार याद्यांतील गोंधळ हा पूर्णपणे बनावट मतदार तयार करण्याचा प्रकार आहे आणि या बनावट मतांवरच सत्तेचा खेळ रचला जातो.
वडेट्टीवार म्हणाले, “आजच्या मोर्चाद्वारे आम्ही निवडणूक आयोगाला इशारा देत आहोत की, जर मतदार याद्यांतील गोंधळ तातडीने दूर केला नाही, आणि आयोगाने भाजपचा सहयोगी म्हणूनच वागणूक दिली, तर देशातील लोकशाही धोक्यात येईल. देशाचं भविष्य अंधारमय होईल. आम्ही शांत बसणार नाही, सरकार आणि निवडणूक आयोगाला बेईमानीचा धडा शिकवला जाईल.”
