इस्लामपूरचे नाव बदलले; सांगलीतील शहर ओळखले जाईल ‘ईश्वरपूर’ म्हणून

 

 Image Source:(Internet)

जिल्ह्यातील इस्लामपूर (Islampur) शहराचे नाव आता अधिकृतपणे बदलून ‘ईश्वरपूर’ करण्यात आले आहे. हा बदल भारतीय सर्वेक्षण संस्थेच्या मंजुरीनंतर केला गेला असून, केंद्र सरकारच्या गृह मंत्रालयाच्या पत्रानुसार ही प्रक्रिया पूर्ण करण्यात आली आहे.

 

नगर परिषदेतर्फे ४ जून २०२५ रोजी हा नाव बदलाचा प्रस्ताव मंजूर झाला. तसेच सांगलीचे वरिष्ठ पोस्ट ऑफिस अधिकारी आणि मध्य रेल्वे, मिरजे येथील सहाय्यक विभागीय अभियंता यांनीही या निर्णयाला पाठिंबा देत नाही हरक प्रमाणपत्र (NOC) जारी केले.

 

भारतीय सर्वेक्षण विभागाचे अधीक्षक तुषार वैश यांनी विज्ञान व तंत्रज्ञान मंत्रालयाला पत्राद्वारे हा बदल कळवला असून, लवकरच राजपत्रात अधिकृत अधिसूचना प्रकाशित होणार आहे. गृह मंत्रालय, जयपूर आणि पुणे येथील भारतीय सर्वेक्षण महासंचालक कार्यालयालाही याबाबत माहिती देण्यात आली आहे.

 

स्थानिक नागरिक आणि प्रशासन या निर्णयाला उत्स्फूर्त प्रतिसाद देत आहेत. सांस्कृतिक वारसा जपण्यासाठी आणि प्रादेशिक ओळख कायम ठेवण्यासाठी हा बदल महत्त्वाचा टप्पा मानला जातो.

 

मंत्री नितेश राणे यांनी सोशल मीडियावर पोस्ट करत म्हटले, “सांगलीतील इस्लामपूरचे नाव आता ईश्वरपूर झाले आहे. स्थानिक लोकांच्या प्रयत्नांमुळे हा बदल शक्य झाला. हा निर्णय फक्त नाव बदलण्यापुरताच मर्यादित नाही, तर हिंदू संस्कृतीच्या वारशाला जपण्याचा एक महत्त्वाचा टप्पा आहे.”

 

त्यांनी पंतप्रधान नरेंद्र मोदी, केंद्र आणि राज्य सरकारचे आभार मानले असून, असा बदल संपूर्ण जिल्हा आणि राज्यासाठी अभिमानाची बाब ठरेल असेही त्यांनी सांगितले.