पोलिस हुतात्मा दिन

 

आज २१ ऑक्टोबर. आजचा दिवस संपूर्ण देशात पोलीस हुतात्मा दिन (Police Martyrs Day) म्हणून पाळला जातो. अखंड देशासाठी त्यागाची भावना ठेवून कर्तव्यावर असलेले अनेक पोलीस जवान शहीद होतात त्यांच्या स्मृतिप्रीत्यर्थ हा दिवस पाळण्यात येतो.

 

२१ ऑक्टोबर १९५९ रोजी पोलिस दलातील १० पोलीस शिपाई लडाख हद्दीत भारत - तिबेट सीमेवर व दोन हजार पाचशे हॉट ग्रीन या सीमेवर निर्जन बर्फाछादित प्रदेशात कडाक्याच्या थंडीत गस्त घालत असताना धोकादायक पद्धतीने दबा धरून बसलेल्या चिनी सैनिकांच्या हल्ल्यात शहीद झाले. या दिवसाची आठवण रहावी तसेच देशामध्ये दहशतवादी हल्ल्यात, नक्षलवादी कारवाईत, समाज कंटक तसेच हिंसक कृत्य करणाऱ्यांकडून कर्तव्यावर असताना शहीद झालेल्या जवानांच्या स्मृतीला या दिवशी उजाळा दिला जातो.

 

२४ तास ऑन ड्युटी असे पोलिसांचे वर्णन केले जाते कारण जनतेच्या सेवेसाठी ते २४ तास तयार असतात. गणेशोत्सव असो की नवरात्री, दसरा असो की दिवाळी, ईद असो की नाताळ देशातील जनतेला सुरक्षित ठेवण्यासाठी ते कायम तत्पर असतात. जेव्हा आपण आपल्या घरात आपल्या कुटुंबासोबत हे सण साजरे करत असतो, तेव्हा ते आपल्या सुरक्षेसाठी कुटुंबापासून दूर असतात. त्यांच्यामुळेच आपण सर्व सण, उत्सव आनंदाने साजरे करू शकतो. कोणतही आपत्ती येऊ मग ती मानवनिर्मित असो की निसर्गनिर्मित जनतेच्या रक्षणासाठी सर्वात प्रथम पोलीसच हजर असतात. पोलिस जनतेच्या सुरक्षेसाठी काय करू शकतात हे मुंबईवर झालेल्या २६/ ११ च्या पाक पुरस्कृत हल्ल्यात संपूर्ण जगाने पाहिले आहे. केवळ पोलिसांच्या धाडसामुळे मुंबईवर हल्ला करण्याचा पाक पुरस्कृत दहशतवाद्यांचा डाव त्यांच्यावरच उलटला. प्राणाची बाजी लावून पोलिसांनी मुंबई वाचवली. या हल्ल्यात अनेक पोलीस शहीद झाले स्वतःच्या प्राणांची आहुती देऊन पोलिसांनी मुंबई करांचा जीव वाचवला.

 

१९९२ साली झालेल्या जातीय दंगलीतही पोलिसांचे कार्य अतुलनीय होते. कोरोना सारख्या महामारीत तर पोलिसांचे महत्व आणखी अधोरेखित झाले. देश वासियांना कोरोनाच्या महामारीपासून वाचवण्यापासून पोलिसांनी जे कार्य केले त्याला तोड नाही. कोरोनाने हजारो पोलिसांचा बळी घेतला तरी पोलीस आपल्या कर्तव्यावरून तसूभरही हलले नाहीत. पंतप्रधानानांनी त्यांना कोविड त्यांच्या या कार्यासाठी कोविड योध्दा ही उपाधी दिली होती. पंतप्रधानांनी दिलेली कोविड योद्धा ही उपाधी सर्वार्थाने योग्य होती. देशातील कायदा आणि सुव्यवस्था राखण्यासाठी आपल्या कुटुंबाची पर्वा न करता बारा ते अठरा तास प्रसंगी सुट्टी न घेता कर्तव्यावर राहून मातृभूमीचे रक्षण करण्यासाठी अनेक जवान शहीद होतात. दहशतवादी, नक्षलवादी यासारख्या देशविघातक शक्तिंविरूद्ध लढताना काहींना विर मरण येते अशा शहीद पोलीस जवानांचे स्मरण करून त्यांच्या पवित्र स्मृतीस अभिवादन करणे हे देशातील प्रत्येक नागरिकाचे कर्तव्यच आहे. या दिवशी सरकारच्या वतीने पोलीस हुतात्मा स्मारकास पुष्पचक्र शहीद पोलीस जवानांना मानवंदना दिली जाते. हा दिवस देशातील सर्व पोलीस दलाचे अधिकारी व कर्मचारी यांच्या दृष्टीने अत्यंत महत्वाचा व पवित्र आहे. पोलिस हुतात्मा दिनानिमित्त शहीद पोलीस जवानांना विनम्र अभिवादन!